Bojomu Ora Bisa Masak? Tenggelamkan?

Ing teras ngarep omahku Laras miwiti critane.
"Kena apa ya Rin awakku saiki gampang kesel, sirahku kerep mumet, magh ku kerep kumat, ilat rasane pait." Manawa disambati mangkono iku paling dak jawab, "Bisa uga kowe kurang leren lan akeh pikiran, Ras (arep ngomong stress kok ora tekan jeneng kanca dhewe). "

 Kepiye maneh, saka panuture Laras, saben esuk mruput dheweke tangi dhisik saperlu masak kanggo keluargane. Anake ana telu, sing paling gedhe kelas 2 SD lan sing paling cilik isih bocah umur 3 taun. Bojone nyambut gawe dadi kuli panggul. Laras dhewe ora oleh kerja karo bojone. Wong wadon prayoga ing omah ngurus anak. Sawise masak, iseh kudu nandangi panggawean liyane. Ora ana wektu kanggo Laras ngurusi awakke dhewe.

"Anakku sing nomer loro njaluk dimasakne endhog diorak-arik, sing nomer siji ora doyan endhog, alhamdulillaah sing nomer telu manut wae, bojoku njaluke kudu sing berkuah. Gelem ora gelem aku masak pirang-pirang jangan supaya kabeh bisa mangan, sinaosa mung sithik-sithik jangane njumbuhake karo dhuwit blanja. Tenagaku entek kanggo masak."

Nate sawijining dina Laras lagi ra kepenak awak kepengen masak jangan asem-asem pedes, anakke do ora gelem mangan saking pedhese lan ana sing ora doyan sayur. Arek tuku lawuh mateng dhuwite mepet, arek masak maneh awake ora kepenak. Ning kono Laras ngrasakke bingung lan sedhih atine. Geneya kok kaya ngene repote, ora tau isoh mangan panganan sing lagi dikarepake, pas masak jangan sing dikarepake anake padha ora gelem mangan.

Bola-bali Laras wis dak kandani, manawa dheweke udu restoran sing bisa ditembungi menu. Nanging dheweke wis pasrah, jarene kuwi pancen tugase, tugas minangka ibu lan bojo. Dheweke ngomong ikhlas.

Apa bener masak kuwi tugase wong wadon? Sapa sing nemtokake? Apa eneng peraturane? Apa masak kuwi dadi kodrate wanita? Kuwajibane wanita? Naluri wanita?

Jawabane mesti "ya ora ana sih, tapi kan awit jaman biyen......." nah iki masalahe, awit jaman biyeen

Ing masyarakat kene pancen wong wadon lan masak kuwi perkara kang jumbuh, dadi gelem ora gelem, seneng ora seneng wong wadon kudu bisa masak. Nek ora bisa masak utawa ora seneng masak tegese dudu wanita kang sejati.

Malah kandhane Luna aku lebay. Lebay piye, lha durung suwe awakku kenalan karo priya, sing ditakokake marang aku "apa aku bisa masak?" Manawa ora bisa masak aku ora bakal dadi bojone. Jebul priya iki golek bojo pelayan. Durung suwe maneh ing internet aku nemokkake meme sing intine wong wadong kudu bisa masak, manawa ora bisa masak jarene dudu istri ideal malah jarene nggon meme arek ditemggelamkan karo Bu Mentri Susi.

Sejatine masak iku perkara kang luwes, sapa bae bisa sinau masak, ya saka buku ya saka internet utawa tekon marang liyan. Manawa masak digathukake karo wanita utawa jinising gender tartamtu, bisa bae ana perkara-perkara kang kaya mangkene:

1. Wong wadon kang ora bisa masak/ora seneng masak/ora ketarik kawigatene ana ing babagan masak diarani wong wadon kang nglawan kodrat, dudu wong wadon kang sejati, wong wadon sing nakal. Banjur wong wadon sing mangkono kuwi diarani ana sing 'kurang'.

2. Nalika masak dianggep kuwajibane wanita, pramila upaya kang ditindakake wanita kanggo masak wis ora dianggep pantes diregani, wong kuwi wis kuwajibane.

Ana uga kancaku sing sregep masak, nanging bojone seneng nyaruwe masakane, sing asin banget, pedes banget, ra eneng rasane, sing paling parah kancaku nganti diidoni marga ing masakan ana rambute.

Paling aku amung bisa ngomong sabar karo praupan simpati. Aku ngucap syukur marang Gusti marga garwaku mesthi gelem dhahar masakanku, (kamangka aku bisa masak bubar wis mantenan, sadurunge blas ora seneng masak) ora meksa aku masak apa sing dikersakake, apa anane janganan kersa dhahar, manawa aku ora karep masak dipundhutake janganan. Maasya Allaah

Manawa ana wanita wis gelem dadi istri, gelem masak, nandangi gaweyan kabeh, momong anak, manut ing garwa, nanging garwane isih akeh nyaruwe, cethil dhuwit, lan pengen nikah maneh, apike garwane dikon belajar renang, supaya ora tenggelam.